Բերանի լորձաթաղանթի բորբոքում է, որն առաջանում է վիրուսային, ստրեպտոկոկային, ստաֆիլոկոկային և այլ վարակներից։ Նախատրամադրող գործոններ են կրած վարակային, նյութափոխանակության, արյան հիվանդությունները, ավիտամինոզները և այլն, որոնց հետևանքով իջնում է օրգանիզմի դիմադրողականությունը։ Ստոմատիտը երբեմն զարգանում է որպես օգտագործվող դեղամիջոցների, մասնավորապես՝ տետրացիկլինի և այլ հակաբիոտիկների նկատմամբ պատասխան ռեակցիա։
Բերանի լորձաթաղանթի ձևաախտաբանական փոփոխությունները կրում են կատառային, ֆիբրինոզ կամ աֆթոզ, նեկրոտիկ֊խոցային բորբոքումների բնույթ։ Երեխաների մոտ առավել հաճախ աֆթոզ ստոմատիտ է հանդիպում։
Վաղ տարիքի երեխաների մոտ հիվանդությունը հաճախ արտահայտվում է ընդհանուր ինտոքսիկացիայի երևույթներով, ջերմության բարձրացումով մինչև 39-40°, թուլությամբ, ախորժակի բացակայությամբ, առատ թքազատությամբ։ Երեխայի գերարյուն, թեթևակի այտուցված այտերի, շրթունքների, լնդերի, լեզվի լորձաթաղանթներում հայտնվում են եզակի կամ բազմաթիվ աֆթաներ՝ կարմիր օղակով շրջափակված տարբեր մեծության սպիտակ և դեղին բծեր (կուտակներ)։ Լեզուն փառակալված է կամ ալ կարմիր։
Բերանի անկյուններում հաճախ ճաքեր են գոյանում։ Մոտակա ավշահանգույցները մեծացած են, ցավոտ։ Ծանր դեպքերում աֆթաները միաձուլվում են և խոցոտվում։ Հիվանդությունը տևում է 1-2 շաբաթ։